![\"\"](\"https://www.aravot.am/2011/aravot_arm/February/17/p18.jpg\")
ԵՄ-ի Միջազգային եւ անվտանգության քաղաքականության հարցերով գերագույն ներկայացուցիչ Քեթրին Էշթոնը փետրվարի 22-ին կայցելի Եգիպտոս: Այդ մասին հաղորդում է news.am-ը: Բանակցություններին կմասնակցեն բարձրաստիճան մի շարք անձինք, սակայն ավելի մանրամասն տեղեկատվություն առայժմ չի հաղորդվում:
Եվրամիության բարձրագույն ներկայացուցիչը նախկինում ուղեւորվել էր Թունիս եւ Մերձավոր Արեւելք: Թունիսում Էշթոնը բանակցություններ էր վարել վարչապետ Մոհամեդ Հանուշիի, ինչպես նաեւ միջազգային համագործակցության, առեւտրի, զբոսաշրջության, տեղական եւ տարածաշրջանային պատասխանատու նախարարների հետ:
Փետրվարի 15-ին եվրոպական դիվանագիտության ղեկավարը հանդիպել էր Իսրայելի ԱԳ նախարար Ավիգդոր Լիբերմանի, ինչպես նաեւ Պաղեստինի վարչապետ Սալամ Ֆայադի հետ: Համաձայն եվրոպական դիվանագիտության ղեկավարի մամուլի ծառայության ավելի վաղ տարածած հաղորդագրության՝ Էշթոնը Իսրայելից մտադիր է թռչել Լիբանան եւ Հորդանան, այդ երկրների առաջնորդների՝ Միշել Սուլեյմանի եւ Հորդանանի թագավոր Աբդալլա 2-րդի հետ հանդիպման նպատակով:
