![\"\"](\"https://www.aravot.am/2011/aravot_arm/February/16/p14.jpg\")
Վրաստանն Ադրբեջանի հետ բանակցություններ էր վարում նավթավերամշակման գործարան կառուցելու շուրջ: Trend-ի մատուցմամբ, փետրվարի 15-ին տեղի ունեցած կառավարության նիստում այդ մասին հայտարարել է Վրաստանի վարչապետ Նիկա Գիլաուրին:
Նրա ասելով, Վրաստանի կառավարությունը ստեղծում է ներդրումային հիմնադրամ, որը ֆինանսավորելու է խոշոր ներդրումային նախագծեր, այդ թվում՝ նավթավերամշակման գործարանի կառուցումը: Վրաստանի վարչապետն ասել է, թե ներկայումս մասնավոր հատվածը չի կարող առանց աջակցության մասնակցել խոշոր ծրագրերին, եւ պետությունը փորձում է ինքը միջոցներ գտել դրա համար:
Վրաստանի էներգետիկայի նախարար Ալեքսանդր Խետագուրին էլ հայտարարել է, թե նավթավերամշակման գործարանի կառուցման համար ֆինանսական միջոցների ներգրավումը կմեկնարկի 2012թ. ապրիլի 1-ից՝ հավելելով, թե «դրանք կլինեն ինչպես՝ մասնավոր, այնպես էլ՝ պետական ներդրումներ», եւ որ գործարանի համար նավթը կմատակարարի Ադրբեջանը:
