![\"\"](\"https://www.aravot.am/2011/aravot_arm/February/16/p8.jpg\")
Լոռու մարզի ընդհանուր իրավասության առաջին ատյանի դատարանը, դատավոր Մարինե Մելքոնյանի նախագահությամբ, ազգությամբ հույն, ալավերդցի 39-ամյա Արմեն Կիլինկարովին դատապարտեց ազատազրկման՝ 5 տարի ժամանակով:
Կայացված դատավճռի մասին ամբաստանյալ Արմեն Կիլինկարովն արտահայտեց իր կարծիքը հետեւյալ նախադասությամբ. «ԺՈ ջՊՐՈրՑՉցպՑ վՈՔ չցՎՈվվօռ րցՊ».
Հիշեցնենք, որ, ըստ մեղադրականի, 39-ամյա Արմեն Կիլինկարովը մեղադրվում էր Ալավերդի քաղաքի բնակիչ Արսեն Շաքարյանին սպանելու մեջ:
Սրանից 10 տարի առաջ Արսեն Շաքար յանի եղբայրը դիտավորությամբ հրազենային վնասվածք էր պատճառել ամբաստանյալի եղբորը՝ Գագիկ Կիլինկարովին: Արմեն Կիլինկարովն էլ, պարզաբանումներ ստանալու նպատակով, մորեղբոր տղայի հետ մեքենայով գնացել է փնտրելու Ա. Շաքարյանի եղբորը: Սակայն ճանապարհին հանդիպել է հենց Արսենին ու նստեցրել մեքենան: Մեքենայում վիճաբանության թեժ պահին իր մոտ գտնվող հրազենից ավտոմեքենայի մեջ կրակել է Արսեն Շաքարյանի որովայնին, ապա վերջինիս դիակը գցել Շեստակովի փողոցի երթեւեկելի մասում եւ դիմել փախուստի:
Օրերս դատարանում Արմեն Կիլինկարովը հայտնել էր, որ իրական հանցագործը Նորիկ Ղազարյանն է, ով այժմ մահացած է:
Արմենի խոսքերով՝ սպանության օրն ինքը գտնվելիս է եղել Վանաձոր քաղաքում: Հետագայում իմացել է, որ սպանողն իր մտերիմ ծանոթ Նորիկ Ղազարյանն է:
«Իրավապահները խորհուրդ տվեցին մեղքը վերցնել ինձ վրա. հիվանդ տղա էր, մտածեցի՝ չգնա 15 տարի նստի»,- ասել էր Ա. Կիլինկարովը:
Դատավճռի հետ Կիլինկարովի պաշտպան Ռուբեն Հակոբյանը համաձայն չէ, բողոքարկելու է, անհրաժեշտության դեպքում՝ մինչեւ Մարդու իրավունքների եվրոպական դատարան:
«Ինչպես կարելի է ապացույցներ չունենալու պայմաններում կայացնել մեղադրական դատավճիռ: Իմ սպասելիքը միայն արդարացման դատավճիռն էր: Անկեղծ ասած՝ պատժաչափը կոնկրետ ինձ չի հետաքրքրում, որովհետեւ շատ թե քիչ՝ որեւէ տարբերություն չկա այն դեպքում, երբ խոսքը մարդու մեղավորության եւ անմեղության մասին է: Իսկ եթե անմեղ մարդուն անգամ մեկ տարի ոչ ճիշտ դատապարտեն, դա արդեն իսկ ողբերգություն է, արդարադատության խաթարում, արդարադատության իմիտացիա»,- ասաց պաշտպանը:
Պաշտպան Հակոբյանը նաեւ իր դժգոհությունը հայտնեց, որ դատարանը նախկինում Կիլինկարովի կրած պատժից 6 ամիս գումարեց նոր ժամկետի վրա. «Ինձ համար շատ հետաքրքիր էր, թե ինչպես դատարանը նախկինում կրած պատժից 6 ամիս գումարեց, այդ հարցով նաեւ շատ հնարավոր է դիմեմ Սահմանադրական դատարան: Մարդը 4 տարի Ռուսաստանում կրել է պատիժը, պրծել է, այդ պատիժը պետք է ամբողջությամբ հաշվակցվեր նշանակված պատժին, հաշվակցվեր, բայց դրանից առաջ 6 ամիս կրած պատիժը գումարվեր նոր տրվածին: Կրած պատիժը չի կարող գումարվել, անարդար դատական ակտ է»,-պարզաբանում է պաշտպանը:
