Երեկ Ռադիոտան առաջ, որտեղ տեղակայված է Հանրային հեռուստառադիոընկերության խորհուրդը, փողոցային առեւտրով զբաղվողները բողոքի ակցիա էին կազմակերպել Հանրային հեռուստաընկերության «Տեսանկյուն» հաղորդաշարի մեկնաբան Գեւորգ Ալթունյանի դեմ: Ցուցարարներն իրենց վրդովմունքն էին արտահայտում՝ ասելով, որ պարոն Ալթունյանն իր հաղորդման ընթացքում վիրավորել է նրանց: «Ա1+»-ի փոխանցմամբ, բողոքի ակցիայի մասնակիցները վստահեցնում էին. «Նա մեզ անվանեց Գիքոր, իսկ այն կուսակցություններին, որոնք մեզ սատարում են՝ բազազներ: Այո, այսօր մեր երկիրը բազազներից ու գիքորներից է կազմված: Բայց բազազները հենց մեր իշխանության ներկայացուցիչներն են»: Ցուցարարներն իրենց դժգոհությունը նաեւ գրավոր հանձնեցին Հանրային հեռուստառադիոընկերության խորհրդին:
Ցուցարարների տարածած հաղորդագրության մեջ գրված է, որ Հայաստանի Հանրապետության Հանրային հեռուստաընկերությունը խեղաթյուրված է ներկայացրել բացօթյա առեւտրով զբաղվող անձանց բողոքի բուն էությունը՝ ապատեղեկացնելով քաղաքացիներին: Եվ քանի որ Հանրային հեռուստաընկերությունը աշխատում է հարկատուների փողերով, ապա պարտավոր է ճշմարտությունը ներկայացնել:
