Երեւանյան «ART EXPO»-ն՝ երրորդ անգամ
![\"\"](\"https://www.aravot.am/2011/aravot_arm/February/12/p13.jpg\")
Հայկական մշակույթի տարբեր «դրսեւորումներ» երեկ համախմբվել էին մեկ հարկի տակ. ՀՀ մշակույթի նախարարության նախաձեռնությամբ փետրվարի 11-ին Նկարիչների միությունում մեկնարկեց «ART EXPO – 2011» արվեստների ցուցահանդեսը: Վերջինիս այցելել է նաեւ ՀՀ նախագահը: Կազմակերպիչներն ասում են, որ այն նպատակ ունի մշակույթի ոլորտի մասնագետներին, շահագրգիռ կազմակերպություններին ու արվեստասեր հանրությանը ներկայացնել հայրենական մշակութային ձեռքբերումները, նոր նախագծերն ու մտահղացումները:
Ներկայացված էր շուրջ 50 պետական, հասարակական եւ մասնավոր մշակութային կազմակերպություն՝ իրենց տաղավարներով՝ թանգարաններ, ցուցասրահներ, թատերական, համերգային կազմակերպություններ, փառատոներ եւ այլն:
Ինչպես պարզեցինք մեր շրջայցի ժամանակ, «ART EXPO»-ին մասնակցող տաղավարներից որեւէ մեկին ցուցահանդեսի բացման առաջին օրը դեռեւս ոչ մի գործարար չէր մոտեցել որեւէ առաջարկով:
Պարի պետական անսամբլի տաղավարը ներկայացել էր վերջին երկու տարիներին ստեղծված հայկական պարային ազգային հագուստներով: Ըստ անսամբլի տնօրեն Էրիկ Չանչուրյանի, «ART EXPO»-ն միջոց է եւս մեկ անգամ աշխարհին ասելու, որ մենք բարձրակարգ մշակույթ ունենք:
Ռուսական արվեստի թանգարանի տաղավարի նկատմամբ այցելուների մեծ հետաքրքրություն էր նկատվում: Ինչպես շեշտեց տնօրեն Անուշ Տեր-Մինասյանը, թանգարանի նմուշները թանկարժեք են եւ այնտեղից դուրս չեն բերվում. «Այսօր ուղղակի ներկայացնում ենք մեր աշխատանքը բուկլետներով ու բրոշյուրներով: Սպասում ենք համագործակցությունների առաջարկների, եւ, կարելի է ասել՝ վստահ ենք, որ այս երկու օրերի ընթացքում դրանք կլինեն, ![\"\"](\"https://www.aravot.am/2011/aravot_arm/February/12/p14.jpg\")
քանի որ մեր թանգարանի նմուշները համաշխարհային նշանակության գործեր են: Դրանցից որոշները Արա Աբրահամյանն է նվիրել, կարծում եմ՝ հայաստանաբնակ գործարարների մեջ էլ կլինեն բարերարներ, որոնք եւս սատար կկանգնեն թանգարաններին»:
«Ռոբերտ Սահակյանց» ստուդիայի նկարիչ, մուլտիպլիկատոր Գայանե Գրիգորյանը մեզ հետ զրույցում խոստովանեց, որ ցուցահանդեսին մասնակցում են զուտ հովանավոր գտնելու ակնկալիքով:
«Արտ-Բրիջ» գրախանութ- սրճարանի աշխատակից Անուշ Սիմոնյանի խոսքով՝ ցուցահանդեսում դժվար է գտնել հովանավորներ, քանի որ միայն սովորական այցելուներն են հետաքրքրված:
Ժողստեղծագործության եւ արվեստագործության կենտրոնը, ինչպես մեզ ասաց տաղավարի ներկայացուցիչը, «ART EXPO»-ին մասնակցում է իրենց միջոցառումների մասին հասարակությանը տեղյակ պահելու նպատակով: Իսկ փոխշահավետ պայմանագրերի ակնկալիք գրեթե չունեն:
«Հայ խոհարարական ավանդույթների զարգացման եւ պահպանման» հ/կ-ն հովանավորների եւ գործարարների՝ իր տաղավարում չէր սպասում: «Այսպես թե այնպես, մենք համագործակցում ենք լավագույն ռեստորանների հետ»,- հայտնեց ներկայացուցիչ Վահե Անթանեսյանը: Այս տաղավարում ներկայացված էին հին հայկական ուտեստները՝ իրենց պատրաստման եղանակներով:
Հայաստանի ազգային կինոկենտրոնը նույնպես գործարարների հետաքրքրությունը շարժելու հույս ունի: Տաղավարի ներկայացուցիչ Անահիտ Թադեւոսյանն ասաց. «Ակնկալիք ունենք կինոգործունեությամբ հետաքրքրվող եւ շահագրգիռ անձանց հանդիպել այստեղ, որոնց հետ կկարողանանք համատեղ արտադրություն եւ գործունեություն ծավալել: Առայժմ միայն հետաքրքրասեր հանդիսատեսի ենք հանդիպում»:
Հ. Գ. Մի բան միայն «մութ» մնաց. ՀՀ մշակույթի նախարարությունը ինչո՞ւ է օտար անվամբ եւ լատինատառ անվանում մտածել հայկական մշակույթի «արտադրանքը» ներկայացնող ցուցահանդեսի համար:
