Ադրբեջանի պաշտպանության նախարար Սաֆար Աբիեւը երեկ ընդունել է ԵԱՀԿ Մինսկի խմբի համանախագահներ Ռոբերտ Բրադկեին, Բեռնար Ֆասիեին, Իգոր Պոպովին եւ ԵԱՀԿ գործող նախագահ Անջեյ Կասպրշիկին: Ըստ news.am-ի՝ Աբիեւի խոսքով, չնայած նրան, որ Մինսկի խմբի գործունեությունը դեռ չի տվել որեւէ կոնկրետ արդյունք, Ադրբեջանը դեռ չի կորցրել այդ առաքելության հետ կապված հույսերը: Նկատելով, որ հակամարտության կարգավորման համար նախապատվություն է տալիս ջանքերի միավորմանը, նախարարը հայտարարել է, թե «Հայաստանը չի հրաժարվում զավթողական քաղաքականությունից, իսկ խաղաղ կարգավորման խաղաղ տարբերակը հնարավոր է միայն այդ համատեքստում»: Պաշտպանության նախարարը հատուկ նշել է, որ Ադրբեջանը լուրջ պատրաստություն է տեսնում «իր հողերը օկուպացիայից ազատելու ուղղությամբ»:
