Երեկ երեկոյան Աբովյան քաղաքի ոստիկանության Կոտայքի քննչական բաժանմունքում մեծ թվով ոստիկանության աշխատակիցներ էին հավաքվել՝ ոստիկանության շենքում տեղի ունեցած սպանության չհաջողված փորձի հետ կապված:
Երեկ, ժամը 12:00-ի սահմաններում, ՀՀ ոստիկանության քննչական գլխավոր վարչության Կոտայքի քննչական բաժանմունքի 4-րդ հարկում ավագ քննիչ Մանուկ Կիրակոսյանի թիվ 406 աշխատասենյակում Աբովյանի 3-րդ միկրոշրջանի 28 շենքի 30 բնակարանի բնակիչ Վլադիկ Խաչատրյանը փորձել է դիտավորյալ ապօրինաբար կյանքից զրկել քաղաքացի Սերգեյ Թադեւոսյանին:
Քննիչի աշխատասենյակ Վլադիկ Խաչատրյանն իր հետ թաքուն դանակ է անցկացրել, եւ երբ քննիչի աշխատասենյակ են բերել Սերգեյ Թադեւոսյանին, նա փորձել է հարվածներ հասցնել նրան: Բարեբախտաբար, նրա հարձակումը կարողացել են կանխել աշխատասենյակում գտնվող ավագ քննիչ Մանուկ Կիրակոսյանն ու նույն բաժանմունքի քննիչ Լեւոն Գրիգորյանը: Քննիչներին օգնության են հասել Ոստիկանության Կոտայքի բաժնի քրեական հետախուզության բաժանմունքի աշխատակիցները, եւ հաջողվել է կրքերը հանդարտեցնել: Սակայն մի քանի րոպե անց Վլ. Խաչատրյանը նորից հարձակվել է Ս. Թադեւոսյանի վրա, բռունցքներով հարվածել նրան՝ պատճառելով մարմնական վնասվածքներ:
Փաստի առթիվ Կոտայքի մարզի քննչական բաժնի պետ Վալենտին Պապյանի հանձնարարությամբ անմիջապես հարուցվել է քրեական գործ ՀՀ քրօրի 34-104 հոդվածի 1-ին մասի հատկանիշներով (սպանության փորձ):
Նախաքննությունը կատարում է Կոտայքի մարզի քննչական բաժնի հատկապես կարեւորագույն գործերով ավագ քննիչը: Այս պահին Վլադիկ Խաչատրյանը ձերբակալվել եւ տեղափոխվել է Կոտայքի մարզի ձերբակալվածների պահման վայր: Իսկ Ս. Թադեւոսյանին տրվել է դատաբժշկի ուղեգիր:
