![\"\"](\"https://www.aravot.am/2011/aravot_arm/February/12/p1.jpg\")
Ազգային ժողովի նախկին պատգամավոր, «ՍԻԼ գրուպ» կոնցեռնի համասեփականատեր Խաչատուր Սուքիասյանին չի բավարարում այն, որ Հատուկ քննչական ծառայությունը իր նկատմամբ քրեական հետապնդումը դադարեցնելու որոշումը հիմնավորել է «ապացույցների անբավարարությամբ»:
«Տվյալ դեպքում խոսքը պետք է գնա ոչ թե ապացույցների անբավարարության հիմքով կարճելու, այլ մեր պաշտպանյալի գործողություններում հանցակազմի բացակայության հիմքով հետապնդումը դադարեցնելու մասին»,- ուրբաթ օրը «Ազատություն» ռ/կ-ին ասել է Սուքիասյանի փաստաբան Արա Զաքարյանը: Գլխավոր դատախազության կողմից բողոքը մերժելու դեպքում գործարարի պաշտպանները մտադիր են դիմել դատարան, իսկ հայաստանյան դատական ատյաններում հաջողության չհասնելու դեպքում նաեւ բողոք կներկայացնեն Մարդու իրավունքների եվրոպական դատարան: Հիշեցնենք, որ Խաչատուր Սուքիասյանը «Մարտի 1»-ի գործի շրջանակներում մեղադրվում էր «զանգվածային անկարգություններ կազմակերպելու» մեջ:
