Գեղարքունիքի մարզպետարանից տեղեկացանք, որ ընտանեկան նպաստների համակարգում կատարված վերջին փոփոխությունները դժվարին իրավիճակի առաջ են կանգնեցրել փաստագրում իրականացնող կառույցներին՝ ժամանակի սղության եւ փաստագրվողների հասցեականության բացակայության պատճառով: Փաստագրման գործընթացը կատարվում է նախատեսվածից շատ դանդաղ եւ մտավախություն կա, որ հունվարի նպաստները հասցեատերերին կարող են տրվել ուշացումով:
Այս անցանկալի իրողությունը բացառելու համար մարզպետ Նվեր Պողոսյանը հիշեցրել է, որ հարկ է կառավարության սահմանած ժամկետում` մինչեւ փետրվարի 11-ը՝ այսօր, ավարտել փաստագրման գործընթացը: Սա, սակայն, քիչ հավանական է, քանի որ մասնավորապես Գավառ քաղաքի Արծվաքար եւ Հացառատ թաղամասերում փաստագրման ներկայացված մոտ 80 ընտանիքների հասցեականությունը բացակայում է անձնագրային կենտրոնական բազայից: Շատ բնակարաններ չունեն կադաստրային վկայականներ եւ կոնկրետ հասցեներ:
Այսօր Գեղարքունիքում ընտանեկան նպաստների համակարգից օգտվում է մոտ 13 հազար ընտանիք: Մարզպետարանում կարծում են, որ փաստագրումից եւ շտկումներից հետո այս թիվը էապես կնվազի:
