Երեկ տեղեկացրել ենք, որ Լեռնային Ղարաբաղի Հանրապետության կառավարությունը հացի գնի թանկացում թույլ չտալու համար արգելել է ցորենի արտահանումը:
Պարենային այլ ապրանքները, սակայն, արդեն թանկացել են:
Լեռնային Ղարաբաղի ազգային վիճակագրական ծառայության տվյալների հիման վրա «Մեդիամաքս» գործակալությունը հաղորդում է, որ հունվարին ԼՂՀ-ում արձանագրվել է պարենային ապրանքների 3,1 տոկոս գնաճ: Մրգերի գները 2010թ. հունվարի համեմատությամբ աճել են 42 տոկոսով, իսկ 2010թ. դեկտեմբերի համեմատությամբ՝ 11,9 տոկոսով: Գնաճի ամենաբարձր ցուցանիշն արձանագրվել է Ասկերանում: Բանջարեղենի ու կարտոֆիլի համար 2010-ի հունվարի համեմատությամբ արձանագրվել է 23,3 տոկոս, իսկ 2010թ. դեկտեմբերի համեմատությամբ 14,8 տոկոս գնաճ: Գնաճի ամենաբարձր ցուցանիշն արձանագրվել է Ստեփանակերտում:
