«Առիթմոլոգիական սրտաբանական կենտրոն» ՍՊԸ-ն «Առավոտ» օրաթերթի դեմ հայցեր է ներկայացրել «Վճարվել է 10 տարվա կյանքի համար, ստացել՝ 7 տարվա: Բժիշկները հիվանդին էլ, պետությանն էլ խաբե՞լ են» (13.11. 10թ.) եւ «Իսկ ո՞ւր մնաց Հիպոկրատի երդումը» (01.12.2010 թ., էլեկտրոնային տարբերակ) հոդվածների համար:
Յուրաքանչյուր գործով ներկայացվել է հերքման, պատասխանի հրապարակման, 2 միլիոն դրամի փոխհատուցման եւ 300 հազար դրամ փաստաբանի վարձատրության պահանջ: Նախորդ օրը «Առավոտի» 1-ին գործով դատական նիստն էր: Այն հետաձգվեց անորոշ ժամանակով: «Իսկ ո՞ւր մնաց Հիպոկրատի երդումը» գործով դատական նիստը նշանակվել է մարտի 17-ին:
Այդ երկու գործերով «Առավոտի» ներկայացուցիչը ՀՀ փաստաբանների պալատի անդամ Կարեն Մեժլումյանն է:
Ընդդեմ «Առավոտի» կա երրորդ հայց էլ՝ «Գորիս» բժշկական կենտրոնը վիճարկում է անցյալ տարվա հոկտեմբերի 26-ին տպագրված «Գորիսում նվազագույն աշխատավարձը 20 000 դրամ է» հրապարակումը: Բժշկական կենտրոնը պահանջում է փոխհատուցում եւ հերքում 3 օրվա ընթացքում: Ի դեպ, նախնական դատական նիստը նշանակվել է փետրվարի 16-ին, ժ.11.30-ին:
Բոլոր երեք հայցադիմումները գտնվում են Կենտրոն եւ Նորք-Մարաշ վարչական տարածքի ընդհանուր իրավասության դատարանի դատավոր Էդիկ Ավետիսյանի վարույթում:
