«Խոսրովի արգելոցի տարածքում մոթել կառուցելն անթույլատրելի է, իսկ Հայաստանի կառավարության՝ նման գաղափարին սատարելու բոլոր հիմնավորումները՝ տրամաբանությունից զուրկ»,- երեկ լրագրողների հետ հանդիպման ժամանակ այսպես է արձագանքել բնապահպան, Էկոլոգիական հասարակական դաշինքի անդամ Կարինե Դանիելյանը: News.am-ի փոխանցմամբ, տիկին Դանիելյանը նաեւ ասել է. «Հիմնավորումը, թե Խոսրովի արգելոցում հյուրատների կառուցումը կարող է նպաստել էկոտուրիզմին, Հայաստանի պարագայում այնքան էլ արդարացված չէ։ Մերոնք սիրում են նման վայրերում կերուխում սարքել, անխնա վերաբերվել բնությանը, ինչն էլ, ի վերջո, կհանգեցնի կենդանական եւ բուսական բազմազանության վերացմանը»: Էկոլոգիական հասարակական դաշինքի անդամ Հրանտ Սարգսյանի խոսքերով էլ՝ «Չնայած Հայաստանի կառավարության որոշման՝ Խոսրովի արգելոցի տարածքում գտնվող Գիլանի արգելավայրը 60 տարի ժամկետով վարձակալության տալ չգիտես թե ում, մենք շարունակելու ենք պահանջել, որ էկոտուրիզմի զարգացման անվան տակ այդ տարածքում հյուրատների շինարարություն չթույլատրվի»:
