![\"\"](\"https://www.aravot.am/2011/aravot_arm/February/11/p7.jpg\")
Գեւորգ Միրաքյանը։
Երեկ Վանաձորում տեղի է ունեցել սպանություն: Առավոտյան ժամը 9:15-ին անհայտ քաղաքացին ոստիկանության Վանաձորի բաժին է ահազանգել, որ Տիգրան Մեծի 54 շենքի բակում դիակ կա: Ոստիկանության աշխատակիցները՝ ոստիկանության Լոռու մարզային վարչության պետ Անուբախ Համբարյանի, Վանաձորի ոստիկանապետ Սերգո Ավետիսյանի եւ քննչական բաժնի պետ Գագիկ Իսպիրյանի գլխավորությամբ, դեպքի վայրում հայտնաբերել են 70-ամյա «Մշկո» մականվամբ, նախկինում 11 անգամ դատապարտված, Վանաձոր քաղաքի Հալաբյան փողոցի 1-ին շենքի 1 բնակարանի բնակիչ Միշա Կիրակոսյանի դիակը՝ բռնության հետքերով: Նույն օրը ոստիկանության Լոռու մարզային վարչության աշխատակիցների ձեռնարկած օպերատիվ հետախուզական եւ քննչական գործողությունների արդյունքում սպանություն կատարելու կասկածանքով ձերբակալվել է Տիգրան Մեծի 54 շենքի 2 բնակարանի բնակիչ «Գիվի» մականվամբ, նախկինում 10 անգամ դատապարտված 51-ամյա Գեւորգ Սեյրանի Միրաքյանը:
Վերջինս քննչական խմբին պատմել է սպանություն կատարելու հանգամանքները: Օպերատիվ-քննչական խումբը պարզել է, որ սպանության գիշերը Տիգրան Մեծի 54 շենքի 2 բնակարանում նրանք միասին կերուխում են արել, որի արդյունքում, ըստ Գեւորգ Միրաքյանի, Միշայի «գլուխը տաքացել է»: «Հաց էինք ուտում, մի քանի բաժակ խմեցինք, Մշկոն մեր ուշունց տվեց: Ես էլ հարցրի՝ ինչի՞ ես մեր քրֆում, ասեց՝ լավ եմ անում, ես էլ Մշկոյի չալիկն առա, տվի գլխին»,- ոստիկաններին պատմել է սպանություն կատարելու կասկածանքով ձերբակալվածը:
«Չալիկը» սպանության գործիք հանդիսացող ձեռնափայտն է: Այնուհետեւ, երբ «Գիվին» համոզվել է, որ «Մշկոն» մահացել է, դիակը դուրս է հանում բնակարանից եւ գցում բակ: Սպանություն կատարողը դեպքի վայրում փորձարարական աշխատանքներից հետո ձերբակալվեց եւ տեղափոխվեց ոստիկանության Վանաձորի ձերբակալվածների պահման վայր (ՁՊՎ): Ոստիկանության քննչական գլխավոր վարչության Լոռու մարզային քննչական բաժնում հարուցվել է քրեական գործ ՀՀ քր.օր.-ի 104 հոդվածի 1-ին մասի հատկանիշներով (սպանություն, ապօրինաբար մեկ ուրիշին դիտավորությամբ կյանքից զրկելը): Այսօր քննչական մարմինը դիմելու է Լոռու մարզի ընդհանուր իրավասության դատարան, որպեսզի 2-ամսյա կալանք կիրառվի նախկինում 10 անգամ դատապարտված Գեւորգ Միրաքյանի նկատմամբ։
