Չորեքշաբթի օրը Պակիստանի կառավարությունը հրաժարական է տվել՝ նախարարների թիվը նվազեցնելու եւ կառավարական ծախսերը կրճատելու ծրագրի շրջանակներում: Այդ մասին հաղորդում է «Ազատություն» ռ/կ-ն:
Երկրի վարչապետ Յուսուֆ Ռազա Գիլանին այժմ պատրաստվում է նոր կառավարություն ձեւավորել, որում նախարարների թիվը նախորդի համեմատությամբ շուրջ մեկ երրորդով պակաս կլինի:
Պակիստանի կառավարությունը՝ իր շուրջ վեց տասնյակ նախարարներով եւ փոխնախարարներով, աշխարհում ամենամեծերից մեկն է: Երկրի տնտեսության համար դժվարին այս շրջանում կառավարությունում կրճատումներ կատարելը Պակիստանի ընդդիմության պահանջն էր, որն ուղեկցվում էր վարչապետի վրա գործադրվող ճնշումներով:
