![\"\"](\"https://www.aravot.am/2011/aravot_arm/February/10/p15.jpg\")
Մեծ Բրիտանիայի արտգործնախարար Ուիլյամ Հեյգը նախազգուշացրել է, որ մերձավորարեւելյան խաղաղ գործընթացը կարող է արաբական աշխարհում տեղի ունեցող արագընթաց փոփոխությունների «զոհը» դառնալ:
BBC-ի մատուցմամբ, ԱԳ նախարարն ասել է, թե իսրայելցիների եւ պաղեստինցիների միջեւ խաղաղության հաստատման ջանքերը «կարող են կասեցվել», եթե միջազգային հանրության ուշադրությունը տեղափոխվի Թունիսի եւ Եգիպտոսի վրա:
Հեյգը, որը այցելությունների շարք է սկսել Մերձավոր Արեւելքի եւ Հյուսիսային Աֆրիկայի երկրներ, Իսրայելին կոչ է արել հրաժարվել «ռազմատենչ արտահայտություններից», իսկ Միացյալ Նահանգներին՝ «վճռականորեն ղեկավարել» խաղաղության գործընթացը: Նախարարն ասել է, թե անորոշությունն ու սպասվող փոփոխությունները ավելի կբարդացնեն մերձավորարեւելյան խաղաղ գործընթացը, եւ այստեղ է, որ Իսրայելն ու ԱՄՆ-ն պետք է արագ միջոցներ ձեռնարկեն:
BBC-ի թղթակիցը, որն ուղեկցում է բրիտանացի նախարարին այդ այցի ընթացքում, շեշտել է, թե Հեյգը հիասթափված է Իսրայելի՝ զիջումների գնալու եւ Արեւելյան Երուսաղեմում շինարարությունը սառեցնելու ցանկության, ինչպես նաեւ բանակցային գործընթացի հստակ գրաֆիկի բացակայության առնչությամբ: Այդ վերջինի համար, ի դեպ, պատասխանատուն Բարաք Օբամայի վարչակազմն է:
