Նյոնում գտնվող ՈՒԵՖԱ-ի շտաբ-բնակարանում անցկացված 2013 թվականի Եվրոպայի երիտասարդական առաջնության ընտրական փուլի վիճակահանության արդյունքով Հայաստանն ընդգրկվեց «C» խմբում, որտեղ խմբային մրցաշարի մրցակիցները լինելու են Չեխիան, Ուելսը, Չեռնոգորիան եւ Անդորրան: Իսկ վիճակահանությունից առաջ ՈՒԵՖԱ-ի գործկոմի անդամները որոշել էին եզրափակիչ մրցաշարը կազմակերպող երկրին: Դրան հավակնում էին Անգլիան, Բուլղարիան, Իսրայելը, Ուելսը եւ Չեխիան: Քվեարկությամբ ընտրությունը կանգ առավ Իսրայելի վրա:
Հիշեցնենք, որ ՀՖՖ նախագահ Ռուբեն Հայրապետյանը երկու օր առաջ լրագրողների հետ հանդիպման ժամանակ հայտարարել էր, որ մեր երիտասարդական հավաքականի նախկին գլխավոր մարզչի պաշտոնում Ֆլեմինգ Սերիցլեւին փոխարինողի անունը հայտնի կդառնա այս վիճակահանության արդյունքներից հետո:
