![\"\"](\"https://www.aravot.am/2011/aravot_arm/February/4/p22.jpg\")
Ռուսաստանի մայրաքաղաքում ընթացող շախմատի «Moscow Open» փառատոնի կանանց պայքարին մասնակցող Հայաստանի միակ ներկայացուցիչ, միջազգային վարպետ Լիլիթ Գալոյանը հինգերորդ տուրում ոչ-ոքի խաղաց տանտիրուհիներից Մարիա Ֆոմինիխի հետ եւ 2,5 միավորով տասը մասնակիցների մեջ շարունակում է զբաղեցնել վեցերորդ հորիզոնականը:
Կրկին անհաջողության մատնվեց եւ 1,0 միավորով վերջին տեղում հայտնվեց Ռուսաստանը ներկայացնող Կարինա Համբարձումովան, որն այս անգամ պարտվեց առաջատարներից մեկին՝ Բաթույագ Մոնգոնտուլին: Հինգ տուրից հետո մրցաշարային աղյուսակը գլխավորում են 4,0-ական միավոր վաստակած մոնղոլուհին եւ ռուսաստանցի Վալենտինա Գունինան:
Երեկ՝ վեցերորդ տուրում, Լիլիթը սեւերով խաղում էր կանանց գրոսմայստեր Օլգա Գիրիայի, իսկ Կարինան՝ չինացի գրոսմայստեր Ժաո Սյուի հետ:
Ուսանող տղաների մրցաշարում Պանզա քաղաքը ներկայացնող ՖԻԴԵ-ի վարպետ Պողոս Նահապետյանի հաղթարշավը կանգնեցրեց գրոսմայստեր Ալեքսանդր Խարիտոնովը, որը հայ շախմատիստի հետ պայքարում մեկ միավոր վաստակեց եւ նույնպես հաղթանակ տարած գրոսմայստեր Իվան Պոպովի հետ միասին վաստակած միավորներով (4,0) հավասարվեց նրան: Երեկ կայացած վեցերորդ տուրում Նահապետյանը սպիտակներով հանդիպում էր գրոսմայստեր Պավել Պանկրատովի հետ:
Փառատոնի շրջանակներում անցկացվող օփենում հայաստանցի երեք շախմատիստներ՝ միջազգային վարպետներ Գոռ եւ Հայկ Հայրապետյանները, ՖԻԴԵ-ի վարպետ Կարեն Հ. Գրիգորյանը եւ Սուրեն Պողոսյանը, «Armchess.am»-ի տեղեկացմամբ, չորս տուրից հետո իրենց անվան դիմաց գրանցել էին 3,5-ական միավոր եւ ընդամենը կես քայլ էին ետ մնում հարյուր տոկոսանոց արդյունք ցույց տված 12 առաջատարներից:
