Հայաստանի մարզերի բնակիչների կենսամակարդակը բարձրացնելու նպատակով կառավարությունը միջոցներ է ձեռնարկել: Կառավարության երեկվա որոշմամբ, մարզերին կհատկացվի ընդհանուր առմամբ 10 միլիարդ 12 միլիոն դրամ: Ամենաշատը՝ 1,3-ական միլիարդ դրամ կուղղվի Արարատի, Լոռու, Կոտայքի մարզերին, 1,2 միլիարդ դրամ կհասնի Շիրակին, 720 միլիոն դրամ՝ Սյունիքին, Արագածոտնի մարզին՝ 666 միլիոն դրամ, իսկ Տավուշին մի քիչ պակաս՝ 632 միլիոն դրամ: Ամենաքիչը Վայոց ձորին՝ 260 միլիոն:
Ըստ փոխվարչապետ Արմեն Գեւորգյանի, գումարների տարբերությունը պայմանավորված է մարզի բնակչության թվաքանակով: Գումարներն էլ ծախսվելու են 2 նպատակով. «Նախատեսվում է կապիտալ կամ մասնակի վերանորոգել դպրոցներ, մշակույթի տներ, մարզպետարանների շենքեր: Նախատեսել ենք նաեւ այդ գումարներով լուծել համայնքների արտադրական ենթակառուցվածքների խնդիրները, մասնավորապես՝ բազմաբնակարան շենքերի տանիքների եւ վերելակների վերանորոգում, ճանապարհների բարեկարգում, ջրամատակարարման եւ գազիֆիկացման հարցերի լուծում»:
