Ուկրաինայի Գերագույն Ռադան երկարաձգել է երկրի խորհրդարանի եւ նախագահի լիազորությունների ժամկետը՝ չորս տարին հասցնելով հինգի:
Սահմանադրության մեջ համապատասխան փոփոխություն կատարելու օգտին երեքշաբթի օրը քվեարկել է Ռադայի 310 պատգամավոր, թեեւ դրա համար բավարար կարող էր լինել նաեւ 300 ձայնը: Այս նախաձեռնությանը «կողմ» քվեարկողների մեծամասնությունը՝ 180 մարդ, եղել են Յանուկովիչի Ռեգիոնների կուսակցության պատգամավորները:
Ուկրաինայում հաջորդ խորհրդարանական ընտրություններն անցկացվելու են 2012թ.-ին, իսկ նախագահական ընտրությունները՝ 2015-ին: Ուկրաինացի օրենսդիրները նաեւ երկարաձգել են պետական եւ տեղական ինքնակառավարման մարմինների ղեկավարների լիազորությունների ժամկետը՝ դրանք եւս սահմանելով 5 տարի:
BBC-ի մատուցմամբ, երեքշաբթի օրն ավելի վաղ նախագահ Վիկտոր Յանուկովիչը հայտարարել էր քաղաքական համակարգում բարեփոխումներ սկսելու մասին՝ ասելով, թե դրանց արդյունքում քաղաքական կայունություն կլինի: Յանուկովիչը հայտարարել է, թե քաղաքական համակարգի բարեփոխումը կիրականացվի սահմանադրական ասամբլեայի մեխանիզմի միջոցով, իսկ դրա պայմանները պետք է լինեն իշխանության թեւերի փոխհամագործակցության ամրապնդումն ու Գերագույն Ռադայի աշխատանքի արդյունավետության բարձրացումը:
