![\"\"](\"https://www.aravot.am/2011/aravot_arm/February/1/p14.jpg\")
Օրերս Նկարիչների միությունում բացվեց ցուցահանդես՝ «Խոսելով միմյանց հետ՝ անձնական հիշողություններ անցյալի մասին Հայաստանում եւ Թուրքիայում» խորագրով: Մինչ այդ՝ ցուցահանդեսը «շրջել» է Գորիսում, Գյումրիում, Իջեւանում:
Այցելուներին ներկայացվեցին պատմություններ եւ հիշողություններ՝ կապված ցեղասպանության հետ, որոնք հավաքագրվել են Հայաստանում եւ Թուրքիայում անցկացված բանավոր պատմության հետազոտության միջոցով:
Հետազոտությունների արդյունքում հրատարակվել է գիրք, որի հայկական մասի հեղինակը ազգագրագետ Հրանուշ Խառատյանն է:
«Առավոտի» հետ զրույցում Հ. Խառատյանը նշեց. «Նախագծի միջոցով փորձել ենք հասկանալ, թե ինչպիսի հիշողություններ են մնացել Եղեռնից՝ Հայաստանում եւ Թուրքիայում»:
Նա ասաց, որ թուրքական կողմի նյութերը զգալիորեն քիչ են, իսկ հետազոտվողների մի մասն էլ անանուն է հանդես գալիս:
Ցուցահանդեսի կազմակերպիչներն են ԴՎՎ Ինթերնեյշնլը (Գերմանիայի ժողովրդական բարձրագույն դպրոցների միության միջազգային համագործակցության ինստիտուտը), «Հայ դերասանների միությունը», «Հազարաշենը» (Ազգաբանական հետազոտությունների հայկական կենտրոն), «Անատոլիայի մշակույթ» (Թուրքիա) կազմակերպությունը: Բացման արարողությանը ներկա էր Հանց-Յոխեն Շվիդտը՝ Գերմանիայի Դաշնային Հանրապետության արտակարգ եւ լիազոր դեսպանը Հայաստանում:
Նմանատիպ ցուցահանդես կազմակերպվել է նաեւ Թուրքիայում՝ Ստամբուլում, Դիարբեքիրում եւ Անտաքյայում: Ցուցահանդեսին ներկա թուրք ներկայացուցիչներն ասացին, որ Թուրքիայում ցուցահանդեսը դրական արձագանք է ունեցել:
