Ինչպես տեղեկանում ենք tert.am-ից՝ երեկ ամբողջ օրը բեռնատարների համար փակ է եղել Ռուսաստանն Անդրկովկասին կապող մայրուղին։ Ինչպես հայտնել է Հարավային Օսիայի արտակարգ իրավիճակների նախարարությունը, պատճառը ամբողջ օրվա ընթացքում տեղացած առատ ձյունն է։ Առայժմ ձնածածկույթի բարձրությունը վտանգավոր չէ, սակայն փրկարարների տվյալներով՝ բեռնատար մեքենաները դժվարությամբ են անցնում լեռնանցքով։ Այս պատճառով որոշում է ընդունվել 2011թ. հունվարի 27–ին՝ ժամը 21։00–ից, ժամանակավորապես կանգնեցնել Տրանսկովկասյան ճանապարհով բեռնատարների անցումը։ Ըստ որոշ աղբյուրների՝ այս օրերին Վրաստանի տարածքով դեպի Ռուսաստան ավտոմոբիլային բեռնափոխադրումներ ընդհանրապես չեն իրականացվում։
Հայաստանի բեռներն ապահովագրված են այդ իրավիճակից, քանի որ ձմռան ամիսներին «Վերին Լարս» անցակետի աշխատանքները դադարում են, եւ Հայաստանից ավտոմոբիլային բեռնափոխադրումներ չեն իրականացվում դեպի ՌԴ։ «Մենք ձմռան ամիսներին լաստանավային փոխադրումներ ենք իրականացնում. բեռները գնում են «Փոթի» նավահանգիստ, այնտեղից՝ Նովոռոսիյսկ, այնուհետեւ՝ Մոսկվա»,- tert.am-ին ասաց Հայաստանի միջազգային փոխադրողների ասոցիացիայի գլխավոր քարտուղար Հերբերտ Համբարձումյանը։
