Երեխաների պաշտպանի դեմ
Շիրակի մարզի դատախազ Դավիթ Սարգսյանին է դիմել Գյումրիի Թամանյան 69 շենքի 28/30 տան բնակիչ Ռուզան Ադանալյանը: Նրա դեմ ներկայումս հարուցված է քրգործ:
Ռուզան Ադանալյանը 2007-ից առնչվել է մարզպետարանի երեխաների բաժնի պետ Լուսինե Գինոսյանի հետ, որն էլ նրա գործով առայժմ տուժող է: Ադանալյանը դատախազին տեղեկացնում է. «Մշտապես շփվել եմ Լ.Գինոսյանի հետ՝ տոկոսով գումար վերցնելու անհրաժեշտության դեպքում: Ապահովելով համապատասխան գրավ, որոշակի ժամկետով վերցնում էի գումար եւ վերադարձնում: Գինոսյանը տոկոսը վերցնում էր կանխիկ՝ իր իսկ տված գումարի վրայից: Ստացվում էր, որ ամեն ամիս տոկոսը կանխիկ էի տալիս, իսկ մայր գումարի պահին այլեւս տոկոսներ չէի մնում տալու: Մեր միջեւ տարաձայնություններ չեն եղել, քանի որ պարտաճանաչ տվել եմ տոկոսը եւ մայր գումարը: Նրա աշխատավայր շատերն էին գնում, հաճախ գոյանում էին հերթեր: Նրա տոկոսները 15-20 տոկոս էին, կախված գրավից»:
Ռ. Ադանալյանը երեխաների պաշտպանության բաժնի պետին համեմատում է գրավատան հետ, որը, ըստ նրա. «Օդի մեջ իր ՀԴՄ-ի վրա գումարներ էր խփում»: Նա տեղեկացնում է նաեւ, որ հերթական անգամ, երբ կարիք է ունեցել գումարի, նա դիմում է $15 000 վերցնելու համար: 1 դոլարը հաշվարկում են 300 դրամով եւ, ըստ նամակագրի, 2008թ. 1-3 ամիսներին յուրաքանչյուր ամսվա համար նա Գինոսյանին է տալիս $1950: Ըստ Ադանալյանի, նա միայն տոկոսով Գինոսյանին 10 ամիսների համար տվել է $19500 գումար: Հերթական անգամ տոկոսը փակելու օրը Գինոսյանը Ադանալյանին հասկացնում է, որ պետք է վերադարձնի գումարը, քանի որ, իր տեղեկություններով, դոլարի կուրսը բարձրանալու էր՝ դառնալով 400-500 դրամ:
«2009թ. փետրվարից մինչ հունիսի 15-ը իմ տոկոսներն ամեն ամիս դարձան $2600: Փաստորեն, վերցրել էի $15 000, 10 ամիսների համար վճարելով $19 500, սակայն էլի պարտք էի մնացել», Ադանալյանը գրում է դատախազին: Վերջինիս «ամբաստանյալը» նաեւ հայտնում է. «Ստիպված էի $150 000 արժողության տան ոսկեղենս գրավ դնել մարզպետարանի աշխատակցի տանը, քանի որ նա «Խա՞ղ ես անում» ասելով, սեղանին դրեց ատրճանակը, հին ու նոր խառնվեց ու ստիպված էի նոր թղթեր ստորագրել»:
Որքան մեզ հայտնի է, այս գործով առերեսում է եղել կողմերի միջեւ ու Ադանալյանը նույնը պնդել է: Անցել է 1,5 տարի, Ադանալյանը ոչ միայն չի ստացել իր թանկարժեք զարդերը, որոնք «գրավ էր դրել», այլ, ըստ քրեական գործի, ստացվեց, թե զարդերը կեղծված են…
