Եգիպտոսի ժառանգն ու նրա ընտանիքը փախել են Լոնդոն

Եգիպտոսի նախագահ Խոսեին Մուբարաքի ժառանգորդ Ջամալ Մուբարաքն (նկարում) ու նրա ընտանիքը այդ երկրում սկսված զանգվածային անկարգություններից անմիջապես հետո փախել են երկրից եւ մեկնել Լոնդոն: Այդ մասին հաղորդում է 1news.az-ը՝ վկայակոչելով արաբական Akhbar al-Arab կայքը: Աղբյուրը պնդում է, թե նախագահի որդու ինքնաթիռը՝ «97 ճամպրուկով» եւ նրա ընտանիքի անդամներով, հունվարի 25-ին Կահիրեից ուղղություն է վերցրել դեպի Լոնդոն:
Հիշեցնենք, որ Եգիպտոսում թունիսյան անկարգությունների ալիքի վրա զանգվածային հակակառավարական ցույցեր են սկսվել: Տարբեր գնահատականներով, ընդդիմությունը փողոց է դուրս բերել 20-30 հազար մարդու, որոնք պահանջում են Եգիպտոսի նախագահի հրաժարականը:
Ցույցը ցրելու համար այդ երկրի ոստիկանությունը արցունքաբեր գազ, ջրցան մեքենաներ եւ ռետինե փամփուշտներ է կիրառել, ինչը, սակայն, ցուցարարներին չի կանգնեցրել: Նրանք հայտարարել են, թե շարունակելու են բողոքի ակցիաներ անցկացնել այնքան ժամանակ, քանի դեռ իրենց պահանջները՝ նախագահի հրաժարական, խորհրդարանի լուծարում, աշխատավարձի բարձրացում, չեն բավարարվել: Ոստիկանության հետ բախումների արդյունքում սպանվել է 4 մարդ, 600 հոգի ձերբակալվել է:
Twitter սոցիալական կայքը հաղորդել է, որ կայքը Եգիպտոսի տարածքում երեքշաբթի օրվանից անհասանելի է: Եգիպտոսի իշխանությունները վստահ են, որ հատկապես այդ կայքի օգնությամբ են ընդդիմադիրները կոչ արել հետեւել Թունիսի օրինակին եւ միանալ երկրի իշխանությունների դեմ բողոքի ակցիաներին:
Եգիպտոսում ծավալվող անկարգությունները ամենազանգվածայինն են 1977թ.-ից ի վեր, երբ մարդիկ փողոցներ էին դուրս եկել երկրում սննդամթերքի անբավարարության պատճառով: