Վրաստանի եւ Իրանի միջեւ երեկվանից սկսել է գործել առանց վիզայի այցելությունների ռեժիմը: Այդ մասին հաղորդում է 1news.az-ը: Վիզային ռեժիմի պարզեցման մասին համապատասխան համաձայնագիրը կողմերը ստորագրել էին 2010թ. նոյեմբերի 3-ին, Թբիլիսիում՝ Իրանի ԱԳ նախարար Մանուչեհր Մոթթաքիի եւ Վրաստանի ԱԳ նախարար Գրիգոլ Վաշաձեի կողմից:
Իրանի քաղաքացիները՝ Վրաստան եւ Վրաստանի քաղաքացիները՝ Իրան առանց վիզայի կարող են այցելել եւ այդ երկրներում մնալ մինչեւ 45 օր: Երկու երկրների քաղաքացիները կարող են օգտվել տարանցիկ անցակետերից:
Վրաստանի արտգործնախարար Գրիգոլ Վաշաձեն շեշտել է, թե համապատասխան համաձայնագրի կնքումը «երկու երկրների միջեւ բարեկամական հարաբերությունների զարգացման ուղղությամբ կատարված մեծ քայլ է»: Նախարարը նաեւ արձանագրել է, որ անցած մեկ տարվա ընթացքում Իրանից Վրաստան այցելող զբոսաշրջիկների թիվն աճել է 173 տոկոսով եւ 63 տոկոսով աճել է երկու երկրների միջեւ ապրանքաշրջանառությունը: «Մեր հարաբերությունների զարգացման համատեքստում դա առաջին քայլն է միայն»,- ասել է Վաշաձեն:
