![\"\"](\"https://www.aravot.am/2011/aravot_arm/January/26/p15.jpg\")
Մոսկվայի «Դոմոդեդովո» օդանավակայանի ղեկավարությունը հերքում է երեքշաբթի օրը օդանավակայանի միջազգային տերմինալի սպասասրահում տեղի ունեցած պայթյունի համար պատասխանատվություն կրելու մեղադրանքը: BBC-ի մատուցմամբ, այդ մասին հայտարարել է օդային հանգույցի մամուլի խոսնակ Ելենա Գալանովան: Հիշեցնենք, որ ՌԴ նախագահ Դմիտրի Մեդվեդեւը նախօրեին հայտարարել էր, թե օդանավակայանը պետք է պատասխան տա անվտանգության կանոնները չապահովելու համար: «Դոմոդեդովոյի» ղեկավարության պնդմամբ, օդանավակայանի ընդհանուր գոտում անվտանգության պատասխանատուն ոստիկանությունն է: Մեդվեդեւը նաեւ արձագանքել է սրան՝ կոչ անելով տեղի ունեցածի պատասխանատվությունն իրար վրա չգցել: Երկրի ընդդիմությունը ահաբեկչական ակտը չկանխելու համար մեղադրել է ռուսական հատուկ ծառայություններին, իսկ վերջինս հայտարարել է, թե ահաբեկչական ակտի իրականացման մեջ կասկածվող անձը 35-տարեկան, սլավոնական արտաքինով մի մահապարտ-տղամարդ է եղել:
Հիշեցնենք, որ օդանավակայանում տեղի ունեցած պայթյունի արդյունքում զոհվել է 35 մարդ, կան հարյուրավոր տուժածներ: Հունվարի 26-ը Մոսկվայում եւ Մերձմոսկվայում սգո օր է հայտարարվել: Հավալենք, որ «Դոմոդեդովո» օդանավակայանում երկուշաբթի օրը տեղի ունեցած պայթյունից տուժածների ցուցակում հայկական կամ հայկականին նման առնվազն չորս ազգանուն կա: Վիրավորվածների թվում են 42-ամյա Կարեն Միխայիլի Գալուստյանը, 58-ամյա Յուրի Ալբերտի Վարդանովը, 65-ամյա Գուրիան Վարդանի Խաչատուրովը եւ 58-ամյա Անատոլի Աշոտի Պողոսբեկովը: Նրանք մոսկովյան հիվանդանոցներում են:
