![\"\"](\"https://www.aravot.am/2011/aravot_arm/January/26/p4.jpg\")
Հայաստանից ԵԽԽՎ պատվիրակներին էլեկտրոնային փոստով ուղարկվել էր ԵԽԽՎ-ում Հայաստանի պատվիրակության ղեկավար Դավիթ Հարությունյանի վերաբերյալ դիմում, որին կից ներկայացված էր նրա մասին «Ժամանակ» օրաթերթի մի հոդված՝ առաջարկելով քննարկել այն:
Դավիթ Հարությունյանը հայտնեց «Առավոտին», որ իր պահանջով այս դիմումի մասին հարցը մտել է իր անդամակցած Եվրոպական դեմոկրատների խմբի (EDG) բյուրոյի նիստի օրակարգ՝ «Այն հիմնավորմամբ, որ եթե հարց ունեն, կպատասխանեմ», եւ քննարկվել հունվարի 23-ի երեկոյան: Քննարկման արդյունքում, ըստ պրն Հարությունյանի, որոշել են չարձագանքել այդ դիմումին. «Ի տարբերություն քաղաքական աճպարարությամբ զբաղվող որոշ խեղկատակների՝ ԵԽԽՎ-ում կարողանում են տարբերել զրպարտությունը խոսքի ազատությունից»:
Քննարկման հաջորդ օրն իսկ՝ հունվարի 24-ի առավոտյան, Դավիթ Հարությունյանն ընտրվել է EDG խմբի բյուրոյի կազմում:
ԵԽԽՎ-ում Հայաստանի պատվիրակության ղեկավարը նաեւ հայտնեց, որ ուղարկված այդ դիմումին ինքը պատասխանել է էլեկտրոնային փոստով: Պատասխանից մեջբերեց մի հատված. «Ցավալի է, որ խոսքի ազատության ոլորտի վերջին շրջանի ազատականացումը եւ ապաքրեականացումը չարամտորեն չարաշահվել է որոշ լրատվամիջոցների եւ քաղաքական ուժերի կողմից: Ես հակված եմ դրան փիլիսոփայորեն նայել եւ դա համարել ազատության եւ ժողովրդավարության անցանկալի, բայց եւ անխուսափելի կողմնակի հետեւանք: Չնայած այս ամենին՝ ես շարունակում եմ լինել այն համոզմունքին, որ խոսքի ազատությունը գերակա է, եւ, որպես Հայաստանի խորհրդարանի անդամ, մտադիր չեմ նախաձեռնել որեւէ օրենսդրական փոփոխություն՝ այն սահմանափակելու ուղղությամբ»:
