Հունվարի 18-ին «Վրացիները խստացրել են վերաբերմունքը» լուրով տեղեկացրել ենք, որ այն բանից հետո, երբ Հայաստանում արգելվեց Վրաստանում մաքսազերծված մեքենաները «Ժամանակավոր ներմուծում» ռեժիմով Հայաստան ներկրել, վրաց պետավտոտեսուչները, որ անտեսում էին մանր խախտումները, խստացրել են հսկողությունը հայկական ավտոմեքենաների հանդեպ:
Հիմա էլ Տավուշի մարզում լուրեր են տարածված, թե իբր Բագրատաշեն-Սադախլոյի անցակետում վրաց պաշտոնատարները խնդիրներ են ստեղծում պարտադիր ապահովագրված հայկական համարանիշներով ավտոմեքենաների համար: Սակայն պարզվում է, որ նման խնդիրներ չկան: Պարզապես վրաց սահմանապահներն արգելում են հին, խորհրդային նմուշի վարորդական իրավունքի վկայականներով հայ վարորդների մուտքը իրենց երկիր: Ձեւական առումով նրանք ճիշտ են, քանզի խորհրդային տարիներին տրված վարորդական իրավունքներում միայն հայերեն եւ ռուսերեն գրառումներ են:
