Այս տարվա գարնանային զորակոչի շրջանակում տեխնոլոգիական մասնագիտություններ ունեցող զորակոչիկներից բարձր տեխնոլոգիական զորամաս ստեղծելու վերաբերյալ Ինֆորմացիոն տեխնոլոգիաների ձեռնարկությունների միությունը (ԻՏՁՄ) ՀՀ պաշտպանության նախարարության հետ նախնական պայմանավորվածություն է ձեռք բերել: Նշված ստորաբաժանման մեջ ծառայության անցնելու համար մինչեւ զորակոչը զորակոչիկների շրջանակում նախատեսվում է հատուկ մրցույթ անցկացնել: Ոլորտի պատասխանատուների ուշադրության կենտրոնում են լինելու հատկապես բարձրակարգ ծրագրավորողները, պատկերների ճանաչման, ցանցային, ռոբոտաշինության մասնագետները: «Մեծ հույսեր ունենք, որ նախաձեռնությունը կդառնա իրականություն, այդ կերպ բանակում գտնվող բարձր տեխնոլոգիաների մասնագետներն ավելի մեծ օգուտ կարող են բերել, քան սովորական ծառայության ձեւով»,- «Առավոտին» ասաց ԻՏՁՄ գործադիր տնօրեն Կարեն Վարդանյանը: Նրա խոսքով՝ նման փորձ կա ամբողջ աշխարհում, մեթոդը լավագույնս օգտագործում է Իսրայելը. «Ամբողջ աշխարհում բանակը հանդիսանում է տեխնոլոգիական զարգացման հիմնական «լոկոմոտիվը»: Հույս ունենք, որ Հայաստանում էլ է այդպես լինելու»:
