2008թ. մարտի 1-ին Երեւանում տեղի ունեցած իրադարձությունների առնչությամբ ՀՀ իշխանություններն այդպես էլ արդյունավետ հետաքննություն չապահովեցին եւ քայլեր չձեռնարկեցին իսկական մեղավորներին պատասխանատվության ենթարկելու ուղղությամբ: Մարտի 1-ի դեպքերի ընթացքում տասը մարդ զոհվեց, որոնցից երկուսը ոստիկան էին, ութը՝ ցուցարար: Անհամաչափ ուժ գործադրելու համար դատապարտվել էր ընդամենը 4 ոստիկան: 2009թ. դեկտեմբերին նրանցից յուրաքանչյուրը 3 տարվա ազատազրկման էր դատապարտվել եւ անմիջապես էլ համաներում ստացել՝ ընդամենը ոստիկանական աշխատանք ծավալելու արգելքով: Այս մասին ասվում է Human Rights Watch կազմակերպության 2011թ. զեկույցում: Նաեւ նշվում է, որ մարտյան դեպքերի առնչությամբ քրեական պատասխանատվության էր ենթարկվել ավելի քան 50 քաղաքացի, որոնք ազատազրկման երկարատեւ ժամկետներ էին ստացել: 2009թ. հունիսին նրանց գերակշռող մասին համաներում էր շնորհվել, սակայն տեղի իրավապաշտպանները պնդում էին, որ քաղաքական հայացքների համար 11 ընդդիմադիր գործիչներ դեռեւս բանտում են:
