Պաշտպանության նախարարի մամուլի քարտուղար Դավիթ Կարապետյանը, պատասխանելով «Առավոտի» հարցին՝ ինչպե՞ս է վերաբերվում մամուլում հրապարակված այն տեղեկությանը, որ Եվրոպայի խորհրդի մարդու իրավունքների հանձնակատար Թոմաս Համմարբերգի հետ հանդիպման ժամանակ Ազգային ժողովի ՀՅԴ խմբակցության անդամները պատրաստակամություն են հայտնել առաջարկություններ ներկայացնել «զինված ուժերում ստեղծված իրադրությունը բարելավելու վերաբերյալ», ասաց. «ՀՀ պաշտպանության նախարարությունը համագործակցում է քաղաքացիական հասարակության կառույցների հետ՝ ստանալով բազմաթիվ առաջարկություններ՝ այդ թվում կուսակցությունների կողմից: Մենք սերտորեն համագործակցում ենք ԱԺ պաշտպանության, անվտանգության ու ներքին գործերի հարցերով մշտական հանձնաժողովի հետ, որը գլխավորում է ՀՅԴ անդամ Հրայր Կարապետյանը: Կարծում եմ՝ մամուլի այդ հրապարակման մեջ տեղ գտած «ստեղծված իրադրությունը բարելավելու» ձեւակերպումը եւ առաջարկությունների հասցեատերը հստակեցման կարիք ունեն»:
