Իրանի նախագահ Մահմուդ Ահմադինեջադը հանդես է եկել ի պաշտպանություն իր ընդդիմախոսի եւ դժգոհություն է հայտնել հայտնի ռեժիսոր Ջաֆար Պանահիի նկատմամբ դատարանի կայացրած վճռի առնչությամբ:
Fars գործակալության մատուցմամբ, Իրանի նախագահի դժգոհությունը հարուցել են հիմնականում Պանահիի դեպքում կիրառված՝ 20 տարվա ընթացքում որպես՝ ռեժիսոր հանդես գալու, նաեւ սցենարներ գրելու, արտերկիր մեկնելու, մամուլի հետ շփվելու արգելքները: Հիշեցնենք, որ բացի այս, Պանահին դատարանի վճռով դատապարտվել է 6 տարվա բանտարկության: Հանրահայտ ռեժիսորն իր ընտանիքի հետ միասին կալանավորվել էր անցած տարվա մարտին: Ավելի ուշ կալանավորված բոլոր անձինք, բացի Պանահիից, ազատ էին արձակվել: Նա հիմնականում մեղադրվում էր 2009թ. նախագահական ընտրություններից հետո Իրանում տեղի ունեցած բողոքի ակցիաների մասին ֆիլմ նկարահանելու համար: Նրա դատավճիռը կայացվել էր անցած տարվա դեկտեմբերին:
