ԱՄՆ նախագահ Բարաք Օբաման ողջունել է 2005թ.-ին Լիբանանի նախկին վարչապետ Ռաֆիկ Հարիրիի սպանությանն առնչություններ ունենալու մեջ կասկածվող անձանց նկատմամբ մեղադրանք ներկայացնելու որոշումը: BBC-ի փոխանցմամբ, մեղադրական եզրակացությունը ստորագրել է ՄԱԿ-ի Լիբանանի հատուկ տրիբունալի դատախազը: Սպիտակ տան ղեկավարի ասելով, դա կարեւորագույն քայլ է Լիբանանում «լիակատար անպատժելիության ժամանակաշրջանը» հաղթահարելու ուղղությամբ:
Մեղադրյալների անուններն առայժմ չեն հրապարակվում, բայց լայնորեն տարածված տեղեկությունների համաձայն, այդ ցուցակում կան շիաների «Հզբոլլա» զինված խմբավորման ազդեցիկ դեմքերի անուններ:
Տրիբունալի դատախազ Սենիել Բելմարը մեղադրական ակտն ու կից նյութերն արդեն փոխանցել է դատավոր Դենիել Ֆրանսենին՝ դատաքննության նախապատրաստման համար: Այդ նյութերի բովանդակությունն այս փուլում կոնֆիդենցիալ է: ՄԱԿ-ի ներկայացուցիչները հայտարարել են, որ կասկածյալների անունները կհրապարակվեն դատավորի կողմից մեղադրական եզրակացությունը հաստատելուց եւ հիշյալ անձանց կալանավորելու թույլտվություն արձակելուց հետո: Դա կարող է տեւել 2-3 ամիս:
