Բաց նամակ Ամալյանին
![\"\"](\"https://www.aravot.am/2011/aravot_arm/January/19/p14.jpg\")
Հարգելի պրն Գ. Ամալյան, «Լռության ձայն» խմբի լսողության խանգարում ունեցող երիտասարդների անունից հայտնում ենք մեր մտահոգությունը Ձեր ղեկավարած հանձնաժողովի դեկտեմբերի 16-ին հեռուստահեռարձակման լիցենզավորման մրցույթում կայացրած որոշման վերաբերյալ, համաձայն որի՝ ԱԼՄ հեռուստաընկերությունը հունվարի 20-ից կդադարի եթերային հեռարձակումը:
ԱԼՄ ՀԸ-ն միակն է հանրապետությունում հեռարձակվող մյուս տասնյակ հեռուստաալիքներից, որը տարիներ շարունակ լրատվական հաղորդումները զուգահեռ ներկայացնում է ժեստերի լեզվով: Ուստի, հունվարի 20-ից ԱԼՄ ՀԸ-ի հեռարձակման դադարից հետո Հայաստանի լսողության խանգարում ունեցող անձինք կզրկվեն իրենց մայրենի լեզվով (ժեստերի լեզու) հանրապետությունում եւ աշխարհում կատարվող իրադարձությունների մասին տեղեկատվություն ստանալուց: Թեպետ տարբեր հեռուստաընկերությունների լրատվական հաղորդումները ուղեկցվում են նաեւ ինֆորմացիոն բնույթի վազող տողով, սակայն դրանք մատչելի եւ հասանելի չեն մեզ:
Մենք պահանջում ենք չանտեսել լսողության խանգարում ունեցող 3500 ՀՀ քաղաքացիների ինֆորմացված լինելու իրավունքները եւ անհապաղ միջոցներ ձեռնարկել հունվարի 20-ից լրատվական հաղորդումները ժեստերի լեզվով թարգմանելու համար չխախտելով լսողության խնդիր ունեցող քաղաքացիների իրազեկված լինելու իրավունքը:
Խնդրում ենք նաեւ օրենքով սահմանված կարգով պատասխան նամակում նշել թվային հեռարձակման լիցենզիա ստացած այն ՀԸ-ները, որոնց մրցութային փաթեթներում ներառված են հաղորդումներ (լրատվական, ինչպես նաեւ այլ բնույթի)՝ ժեստերի լեզվի ուղեկցությամբ, եւ արդյոք նախատեսվո՞ւմ է դրանց հեռարձակումը հունվարի 20-ից: Այլապես ԱԼՄ-ի հեռարձակման դադարեցմամբ դուք նպաստում եք խուլերի համայնքի մեկուսացմանը հասարակական իրադարձություններից՝ խախտելով ՀՀ քաղաքացիների իրավահավասարության սկզբունքը:
