Հունվարի 25-ին Թբիլիսիից սկսելու է եթեր հեռարձակվել «Առաջին կովկասյան տեղեկատվական», իսկ ռուսերեն հապավումով՝ կԼԽ հեռուստաալիքը, որի, ինչպես նաեւ ալիքի էլեկտրոնային կայքի՝ www.pik.tv-ի շնորհանդեսը տեղի է ունենալու նույն օրը Թբիլիսիում տեղակայված «Եվրոպայի տան» շենքում:
«Առաջին կովկասյան տեղեկատվական» անունը կրող հեռուստաալիքը Կովկասի պատմության մեջ եզակի մեդիա-նախագիծ է: Տեղեկատվական, կրթական եւ զվարճալի հաղորդումների ալիքը հեռարձակվելու է ռուսերեն լեզվով, վեցժամյա ռեժիմով՝ Մոսկվայի ժամանակով ժ. 18:00-24:00-ը եւ ընդգրկելու է Հարավային եւ Հյուսիսային Կովկասի, Ուկրաինայի, Բելառուսի, Արեւելյան Եվրոպայի, Ռուսաստանի, Թուրքիայի եւ Իրանի տարածքները:
կԼԽ հեռուստաալիքը եթեր է հեռարձակվելու նաեւ Hot Bird@E13 արբանյակից եւ online ձեւաչափով՝ նաեւ www.pik.tv էլեկտրոնային կայքով:
Հեռուստաալիքի ղեկավարների պնդմամբ, կԼԽ-ը մտադիր չէ քարոզչության դեմ քարոզչության օգնությամբ պայքարելու, բանավեճի մեջ մտնելու այլ ԶԼՄ-ների կամ կառավարությունների հետ եւ գնահատականներ տալու: «Մենք հեռուստաալիքը դիտողներին կապահովենք բոլոր անհրաժեշտ պայմաններով՝ սեփական կարծիք ձեւավորելու, վեճերից խույս տալու համար: Մենք ուզում ենք լինել այն ալիքը, որը դուք դիտելու եք՝ իմանալու համար, թե ինչ է տեղի ունենում Կովկասում: Նրանց համար, ովքեր կասկածում են, մենք ունենք պարզ պատասխան. նախ՝ դիտեք, հետո՝ դատեք»,- հայտարարել է հեռուստաալիքի գլխավոր տնօրեն Ռոբերտ Պարսոնսը:
