Երեկ Տիգրան Պետրոսյանի անվան շախմատի կենտրոնական տանը կայացավ շախմատի Հայաստանի տղամարդկանց բարձրագույն խմբի 71-րդ առաջնության բացումը, իսկ այսօր 12 գրոսմայստերներ պայքարը կսկսեն հանրապետության չեմպիոնին եւ մրցանակակիրներին որոշելու, ինչպես նաեւ ազգային հավաքականի միակ թափուր տեղի ուղեգիրը նվաճելու համար:
Տղամարդիկ պայքարը պետք է սկսեին աղջիկների հետ նույն օրը, սակայն գրոսմայստեր Զավեն Անդրիասյանի վատառողջության պատճառով ֆեդերացիան որոշեց մեկնարկը հետաձգել մեկ շաբաթով: Վիճակահանությամբ այսօր առաջին տուրում միմյանց հետ հանդիպելու են Հայաստանի գործող չեմպիոն Ավետիք Գրիգորյանն ու Տիգրան Լ. Պետրոսյանը, Ռոբերտ Հովհաննիսյանն ու Տիգրան Քոթանջյանը, Արման Փաշիկյանն ու Արտաշես Մինասյանը, Զավեն Անդրիասյանն ու Արա Մինասյանը, Հրանտ Մելքումյանն ու Դավիթ Գ. Պետրոսյանը, Սամվել Տեր-Սահակյանն ու Աշոտ Անաստասյանը:
Հիշեցնենք, որ մարզաձեւի Հայաստանի առաջնության անցկացման պատմության ընթացքում առաջին անգամ է, որ բոլոր մասնակիցները կրում են միջազգային գրոսմայստերի կոչում:
