Կատակում են ուսանողները
***
Բուհերից մեկի անգլերեն լեզվի դասախոսը պետք է մասնակցեր կարեւոր մի գիտաժողովի եւ հնարավորություն չուներ դասը պարապելու: Մեկնելուց առաջ նա իր լսարանի գրատախտակին գրեց հետեւյալը. «Professor will not meet his classes today», որը բառացիորեն նշանակում է՝ «Պրոֆեսորը այսօր չի կարող հանդիպել իր ուսանողների հետ»: Հնարամիտ ուսանողները ջնջում են classes բառի առաջին տառը: Ստացվում է այնպես, որ պրոֆեսորը այսօր չի կարող հանդիպել իր սիրուհիների հետ (lasses՝ սիրուհի): Հաջորդ օրը ներս է մտնում պրոֆեսորը, կարդում ուղղված տեքստը, ջնջում եւս մեկ տառ եւ լուռ հեռանում լսարանից, քանի որ նա չի ցանկանում արդեն հանդիպել ավանակների հետ (asses՝ ավանակ):
***
Ապագա անասնաբույժ երկու ուսանողներ ճաշում էին խորտկարանում: Ներս է մտնում նրանց ընկերներից մեկը եւ իբր զարմացած հարցնում.
– Տղերք, էդ ի՞նչ եք ուտում:
– Չե՞ս տեսնում՝ հավի գրիլ ա,- ասում են տղաները:
– Բա ես էլ կարծեցի, թե շան գրիլ ա,- կատակում է հնարամիտը:
– Քո ուզած գրիլը կարող ես ուտել «Շանգրի լա» խաղատանը,-իրենց սրամտությամբ հաղթում են տղաները:
