Հունվարի 30-ին Տավուշի մարզի Իջեւանի տարածաշրջանի Լուսահովիտ եւ Սարիգյուղ համայնքներում կկայանան համայնքի ղեկավարի ընտրություններ:
Տավուշի թիվ 40 ընտրատարածքային ընտրական հանձնաժողովից տեղեկացանք, որ Լուսահովիտ գյուղում առաջադրվել է երկու թեկնածու՝ գործող համայնքապետ Արայիկ Սարհատյանը եւ նախկին համայնքապետ, ներկայումս չաշխատող Վոլոդյա Սարհատյանը: Երկու թեկնածուներն էլ հանրապետական են: Լուսահովիտը փոքր գյուղ է, հազիվ 400 բնակիչ ունի եւ այստեղ շատերն են իրար բարեկամ:
Իսկ Սարիգյուղում գործող համայնքապետ, հանրապետական Կոմիտաս Էլլարյանի հետ կմրցակցի անկուսակցական, ներկայումս չաշխատող Գագիկ Մադաթյանը:
Հանրապետականն ընդդեմ հանրապետականի «ձեւաչափով» ընտրությունը նորություն չէ: «Առավոտը» տեղեկացրել է, որ 2009-ին նման ընտրություն եղավ Տավուշի մարզի Աչաջուր, Լոռու մարզի Մարգահովիտ գյուղերում, իսկ 2010-ին, հանուն գյուղապետի աթոռի, հանրապետականը մրցում էր հանրապետականի հետ՝ Սյունիքի մարզի Աճանան գյուղում:
