![\"\"](\"https://www.aravot.am/2011/aravot_arm/January/13/p17.jpg\")
Բրիտանական խորհրդարանի պատգամավոր Էրիկ Իլլսլին (նկարում) խոստովանել է, որ պաշտոնեական ծախսերի անվան տակ ապօրինաբար յուրացրել է 14 հազար ֆունտ՝ մոտ 22 հազար դոլար:
Պատգամավորը խոստովանել է նաեւ, որ կեղծել է տեղական հարկերի եւ պետական բնակարանի պահպանման ծախսերի մասին երեք հաշվետվություն: 2010թ. մայիսին Իլլսլին Համայնքների պալատում վերընտրվել էր Լեյբորիստական կուսակցության կողմից, որտեղից նրան մեղադրանք առաջադրելուց անմիջապես հետո հեռացրել էին: Հիմա նա անկախ պատգամավոր է: Չնայած դրան, լեյբորիստների առաջնորդ Էդ Միլլիբենդը հայտարարել է, թե Իլլսլին պետք է անի այն, ինչ «պետք է արվի նման դեպքերում»՝ հրաժարվի պատգամավորի իր մանդատից: Անցած ուրբաթ օրը մեկ այլ նախկին լեյբորիստ՝ Դեւիլ Չեյտորը դարձավ առաջին պատգամավորը, որն ազատազրկման դատապարտվեց Վեստմինստրում ծախսերի հետ կապված մեքենայությունների գործով: Նա դատապարտվեց մեկուկես տարվա բանտարկության՝ ընդհանուր առմամբ 22 հազար ֆունտի ծառայողական ծախսերի մասին կեղծ հաշվետվություններ ներկայացնելու մեղադրանքով:
Իլլսլին, սակայն, այդ գործով միակ ամբաստանյալն է, որ շարունակում է պատգամավոր լինել: Դատարանը մեկ ամիս ժամանակ է վերցրել՝ նրա դատավճիռը պատրաստելու համար: Եթե Իլլսլին դատապարտվի մեկ կամ ավելի տարվա ազատազրկման, ապա, համաձայն գործող օրենսդրության, նա պարտադրված կլինի հրաժեշտ տալ իր պատգամավորական մանդատին:
