Ասում է գյուղատնտեսության նախկին նախարարը
Գյուղատնտեսության նախկին նախարար ՕԵԿ-ական Գերասիմ Ալավերդյանը հերքում է մամուլի այն հրապարակումը, ըստ որի՝ ինքը գյուղնախարարի պաշտոնից հեռանալուց հետո իր հետ է տարել նախարարության հաշվեկշռում գտնվող հեռուստացույցը: «Ընդհակառակը, ես կահավորել եմ իմ կաբինետը, սիրուն սարքել եմ, նոր թողել-գնացել եմ»,-News.am-ի հետ զրույցում ասաց Ալավերդյանն ու հավելեց. «Երբ ես եկել եմ նախարարի իմ աշխատանքին, սենյակումս ոչ մի բան չի եղել: Ես կահավորեցի այն եւ հեռանալուց նույնիսկ ոչ մի ասեղ էլ հետս չտարա: Դա ինձ ոչ պետք է, ոչ էլ անհրաժեշտ էր, մանավանդ, որ ինձանից հետո իմ քաղաքական թիմի ներկայացուցիչն է անցել գործի»,- բացատրեց Ալավերդյանը:
Նա նշեց նաեւ, որ պատրաստվում է հերքում պահանջել այդ տեղեկությունը տպագրած թերթից, եւ այդ մասին ՕԵԿ մամուլի ծառայությունն արդեն իսկ աշխատանքներ է տանում:
Ինչ վերաբերում է մամուլի այն տեղեկությանը, թե նախարար եղած ժամանակ Ալավերդյանն իր ծննդյան օրվա կապակցությամբ նախարարության աշխատակիցներից որպես նվեր 200-ական դոլար գումար էր հավաքել, Ալավերդյանն ասաց. «Ես այդ մասին արդեն մեկնաբանություն տվել եմ եւ էլ հավես չունեմ մեկնաբանելու: Ասել եմ, որ նման լուրերը հերյուրանքներ են, մարդու վարկաբեկելու խնդիր են հետապնդում: Էլ չգիտեն՝ ինչ գրեն, նման անհեթեթ բաներ են գրում»,- հայտարարեց նախկին նախարարը:
Նշենք, որ թերթերից մեկը գրել էր, թե ՀՀ գյուղատնտեսության նախկին նախարար ՕԵԿ-ական Գերասիմ Ալավերդյանը նախարարական աթոռը լքելուց հետո իր հետ է տարել նախարարության հեռուստացույցը: Նախարարության պատասխանատուները Ալավերդյանին հորդորել են ձեռնպահ մնալ այդ ոչ այնքան գեղեցիկ արարքից, սակայն նա հակադարձել է՝ թե «նայել է» հեռուստացույցի փաստաթղթերը, ու ինքն ամեն ինչ «ճիշտ է անում»:
