![\"\"](\"https://www.aravot.am/2011/aravot_arm/January/11/p24.jpg\")
FIDE-ի վարկանիշային դասակարգման աղյուսակում, Լեւոն Արոնյանից հետո, հայ շախմատիստների մեջ երկրորդ ամենաբարձր վարկանիշն ունեցող գրոսմայստեր Սերգեյ Մովսիսյանը, որ տարիներ շարունակ ներկայացնում էր Սլովակիան, այսուհետեւ հանդես է գալու Հայաստանի դրոշի ներքո:
Անվանի գրոսմայստերի տեղափոխումը կայացել է դեռ անցած տարվա վերջին՝ երկու երկրների ազգային ֆեդերացիաների փոխադարձ համաձայնությամբ, ինչը հաստատել եւ օրինականացրել է նաեւ մարզաձեւի միջազգային ֆեդերացիան: Մովսիսյանը միջազգային ամենաբարձր կարգի մրցաշարերում աչքի է ընկնում հաջող ու կայուն մրցելույթներով: Այնպես որ, նրա ներգրավումը շախմատի Հայաստանի ազգային հավաքականի կազմ՝ զգալիորեն կուժեղացնի մեր ընտրանու ըմդհանուր խաղամակարդակը, մանավանդ՝ մրցաշրջան 2011-ում սպասվող կարեւորագույն մեկնարկներում: Միայն թե առայժմ հայտնի չէ, թե նա որ խաղատախտակի առջեւ հանդես կգա:
