Թուրքական լրատվամիջոցների փոխանցմամբ, այդ երկրում հանրային քննարկումներ են սկսվել Nabucco գազատարի կառուցման նպատակահարմարության շուրջ։ Քննարկումներն ընթանում են այն քաղաքներում, որտեղով պետք է անցնի գազատարը՝ Արդահան, Կարս, Էրզրում, Գյումյուշխանե, Սիվաս, Կիրշեհիր, Կիրիկկալե։ News.am-ի մատուցմամբ, քննարկումների ավարտական փուլը կանցկացվի Անկարայում։ Հիշեցնենք, որ այս նախագծով նախատեսվում է ադրբեջանական եւ միջինասիական գազը հասցնել Եվրոպա:
Ռուսաստանը դեմ է Nabucco-ին եւ իրականացնում է այլընտրանքային «Հարավային հոսք» ծրագիրը, որով թուրքմենական եւ ուզբեկական գազը Եվրոպա կհասցվի Ռուսաստանի տարածքով։ Ռուսաստանի վարչապետ Վլադիմիր Պուտինը բազմիցս քննադատել է Nabucco ծրագիրը՝ նշելով, որ այն հեռանկարային չէ, քանի որ պարզ չէ, թե ինչ աղբյուրներից պետք է լցվի գազատարը։ Պատահական չէ, որ գազատարի կառուցման սկիզբն անընդհատ հետաձգվում է։ Ըստ վերջին տեղեկությունների՝ Nabucco-ն կսկսեն կառուցել 2012 թվականից:
