Իսրայելի ռազմաօդային ուժերը երկուշաբթի լույս երեքշաբթի գիշերը հարվածներ են հասցրել Գազայի հատվածում յոթ թիրախների: Newsru-Israel-ի մատուցմամբ, այդ մասին հայտարարել է Իսրայելի պաշտպանության բանակի մամուլի ծառայությունը:
Գազայի հատվածի հյուսիսում կետային հարձակման է ենթարկվել երեք թունել, որոնք նախատեսված են եղել Իսրայելի տարածք ահաբեկիչների տեղափոխման համար: Հարավային հատվածում՝ իսրայելական ռազմական օդուժը գնդակոծել է երկու թունել, որոնցից մեկով սպառազինություններ, մյուսով՝ մաքսանենգ ճանապարհով զենք է տեղափոխվել: Գնդակոծման է ենթարկվել նաեւ զենքի եւ ռազմամթերքի մի արտադրամաս, եւ ահաբեկիչների եւս մի թիրախ, որի մասին մանրամասներ չեն հաղորդվում: Փոխարենը Իսրայելի պաշտպանության բանակը հայտարարել է, թե այդ հարվածները վերջին օրերին Գազայի հատվածից իսրայելական տարածքների ռմբակոծության պատասխանն են: Պաղեստինյան աղբյուրների մատուցմամբ, այդ հարձակումների արդյունքում, տարբեր տվյալներով, վիրավորվել է 2-3 գրոհային: Հաղորդվել է նաեւ, թե իսրայելական օդուժի թիրախը «Համաս» շարժման օբյեկտներն են եղել:
