Տավուշի մարզպետարանի սոցապ եւ առողջապահության վարչությունում հայտնեցին, որ մարզում, հատկապես Իջեւան քաղաքում տարածված են գրիպի դեպքերը: Վարչությունում սակայն դա համաճարակ չեն համարում, գտնելով, որ ամեն տարի այս ժամանակահատվածում գրիպը տարածված է լինում: Գրիպի տարածմանը նպաստում է նաեւ ներկայումս մարզում առկա չոր, արեւային եղանակը: Վարչության տվյալներով՝ գրիպով հիվանդացության դեպքերն անցյալ տարվա նույն ժամանակաշրջանի համեմատությամբ ավելի քիչ են: Հիգիենիկ եւ հակահամաճարակային տեսչության Տավուշի մարզային կենտրոնի պետ Ռոման Թադեւոսյանը հայտնեց, որ իրենք տեղեկատվություն են ստանում Իջեւանի դպրոցներից բացակայող երեխաների վերաբերյալ՝ միայն Իջեւանի թիվ 5 եւ Աչաջուր գյուղի դպրոցներում է գրիպով հիվանդների քանակը մեծ:
Իջեւանի բնակիչներն էլ հայտնեցին, որ այս տարի գրիպը բնորոշվում է նրանով, որ կրկնվելու հատկություն ունի: Իջեւանի թիվ 5 եւ ավագ դպրոցներում հեպատիտ Ա-ով՝ դեղնուկով հիվանդության դեպքեր կան:
