Իսրայելը պատրաստ է քննարկել պաղեստինցիների հետ բանակցությունները վերականգնելու համար անհրաժեշտ բոլոր հարցերը՝ մերձավորարեւելյան հիմնախնդրի խաղաղ կարգավորման հասնելու նպատակով: ԻՏԱՌ-ՏԱՍՍ-ի մատուցմամբ, այդ մասին հայտարարել է Իսրայելի վարչապետ Բինիամին Նեթանյահուն՝ Մերձավոր Արեւելքի հարցով ԱՄՆ նախագահի հատուկ ներկայացուցիչ Ջորջ Միտչելի հետ տեղի ունեցած հանդիպման ժամանակ:
Սպիտակ տան ներկայացուցիչը տարածաշրջան է այցելել իսրայելցիների եւ պաղեստինցիների հետ առանձին-առանձին խորհրդակցություններ վարելու համար՝ խաղաղ գործընթացը հերթական անգամ փակուղուց դուրս բերելու նպատակով: Միտչելը տարածաշրջան կատարած այցից առաջ հայտարարել էր, թե երկու կողմերն էլ ուղիղ բանակցությունների ժամանակ պայմանավորվել են համատեղ հասնել շրջանակային համաձայնագրի ստորագրմանը, որը որոշակիացնելու է բոլոր հիմնական հարցերի առնչությամբ փոխզիջումների հիմք հանդիսացող կետերը եւ դառնալու է վերջնական խաղաղ համաձայնագրի ուղղությամբ կատարված եւս մեկ քայլ:
Միաժամանակ, Միտչելը խոստովանել է, թե դրան հասնելը հեշտ չի լինելու, քանի որ կողմերի միջեւ կան էական եւ մշտական հակասություններ:
Դիվանագիտական աղբյուրների տեղեկություններով, ԱՄՆ-ն Իսրայելից ակնկալում է՝ հստակեցնել դիրքորոշումը պաղեստինա-իսրայելական հակամարտության առանցքային խնդիրների շուրջ: Խոսքն առաջին հերթին վերաբերում է ապագա սահմաններին, Երուսաղեմի կարգավիճակին, պաղեստինցի փախստականների վերադարձին, անվտանգության հարցերին, հրեական բնակավայրերի ճակատագրին եւ ջրային ռեսուրսների բաշխմանը:
Հիշեցնենք, որ իսրայելա-պաղեստինյան ուղիղ բանակցությունները վերսկսվել էին ԱՄՆ-ի հովանու ներքո՝ այս տարվա սեպտեմբերին եւ շուտով ընդհատվել էին Իսրայելի կողմից Հորդանանի արեւելյան ափին հրեական բնակավայրերի շինարարության վերսկսման պատճառով:
