Երեկ «Առավոտին» մի քանի ծնողներ, որոնց երեխաները սովորում են Սլավոնական միջնակարգ դպրոցում, հայտնեցին, որ վերոնշյալ դպրոցի երրորդ դասարանցիները արդեն մի քանի օր է՝ բոյկոտել են դասերը: Պատճառը, նրանց ներկայացմամբ, հինգ հոգանոց դասարանում հայտնված նորեկն է՝ Գ. Վ.-ն, ով խախտել է համադասարանցիների անդորրը: Ծնողները բողոքեցին, թե նա ստորացնում է իրենց երեխաներին, հայհոյում, խանգարում դասերը: Ծնողները իրենց մտահոգող հարցով դիմել են դպրոցի տնօրեն Յ. Յակովենկոյին, սակայն առայժմ մնացել են անարձագանք:
«Առավոտը» դպրոցում ստեղծված իրավիճակի մասին պարզաբանում խնդրեց դպրոցի տնօրենից, ով հաստատեց մեր տեղեկությունները, ասաց, որ երրորդ դասարանցիները, իսկապես, մի քանի օր չեն հաճախել դպրոց՝ իրենց համադասարանցու ոչ ադեկվատ պահվածքի պատճառով: Մանրամասներ հեռախոսազրույցի ընթացքում տնօրենը չցանկացավ հաղորդել, ասելով, թե դրանք «ներքին խոհանոցի» հարցեր են: Ըստ Յ. Յակովենկոյի, արդեն դպրոց է հրավիրել ծնողներին, որոնց հետ զրույց է ունեցել եւ գործին լուծում տվել: Տնօրենը հավաստիացրեց, որ երեխաները կրկին հաճախելու են դպրոց:
