«Հատիս» կանանց բասկետբոլային ակումբի գլխավոր մարզիչ Գիա Ղազանչյանի պաշտոնանկության մասին լուրն առաջինը «Առավոտն» էր հրապարակել: Դրան հաջորդեցին այլ լրատվամիջոցներում մասնագետի ազատման պատճառների մասին մեկնաբանությունները, որոնցում գլխավորը, թերեւս, այն է, որ Ղազանչյանը Հայաստանից հեռացել է նեղացած: Ինչո՞ւ, իրականում ի՞նչն է պատճառ հանդիսացել, որ ակումբը հրաժարվել է նրա ծառայություններից: Երեկ Հայաստանի բասկետբոլի ֆեդերացիայի նախագահ, «Հատիս» ակումբի վարչության անդամ Հրաչյա Ռոստոմյանից ստացանք լրացուցիչ մեկնաբանություններ, որոնք, կարծում ենք, հիմնավոր են եւ հարցին վերջակետ կդնեն: «Ես իմ պաշտոնական մեկնաբանությունում արդեն հայտարարել եմ, որ «սեփական դիմումի համաձայն» ձեւակերպումն ակումբն արել է նրա հետագա կարիերային չվնասելու նպատակով: Իսկ քանի որ խնդիրը մնացել էր առկախ եւ դարձել ԶԼՄ-ների քննարկան թեմա, տեղեկացնեմ, որ այս տարի թիմում չկար մարզական կարգապահություն, մարզիչը չէր տիրապետում իրավիճակին, որի պատճառով էլ աղջիկների մեջ համերաշխության մթնոլորտն էր բացակայում: Այստեղից էլ՝ այս տարի Եվրագավաթի խաղարկության շրջանակներում «Հատիսի» չորս պարտությունները խաղացված չորս հանդիպումներում»:
Եթե խոսքը այլ երկրի ու այլ մարզաձեւի մասին լիներ, նման ձախողումից հետո մարզիչն ինքը հրաժարական կտար:
