Դավանանքի ազատության իրականացման եւ կրոնական կազմակերպության անդամ լինելու պատճառաբանությամբ 2010 թվականի ընթացքում պարտադիր զինվորական ծառայությունից շուրջ հիսուն ՀՀ քաղաքացի է հրաժարվել, aysor.am-ին հայտնել է ՀՀ պաշտպանության նախարարի մամուլի խոսնակ Դավիթ Կարապետյանը, հավելելով, որ պարտադիր զինվորական ծառայությունից հրաժարված անձանց նկատմամբ քրեական գործեր են հարուցվել, որոնք գտնվում են Զինվորական դատախազությունում:
Մամուլի խոսնակը նաեւ տեղեկացրել է, որ թեեւ դավանանքի ազատության իրականացման նպատակով կրոնական կազմակերպության անդամ ներկայացող զորակոչիկներին առաջարկվել է այլընտրանքային ծառայություն անցնել, այնուամենայնիվ՝ «2007 թվականից ոչ ոք այլընտրանքային ծառայության չի գնացել»: «Նախընտրում են դատվել, քան թե գնալ այլընտրանքային ծառայության»,- ասել է Դավիթ Կարապետյանը:
Ըստ ՊՆ մամուլի խոսնակի, զինվորական ծառայությունից խուսափում են հիմնականում «Եհովայի վկաները», «հիսունականները» եւ այլ ոչ ավանդական կրոնական հոսանքների հետեւորդները:
