Երեկ կայացավ ԵՊՀ մշակույթի կենտրոնի կինոակումբի բացման արարողությունը: Մշակույթի կենտրոնի նախաձեռնությամբ ստեղծված կինոակումբը կգործի Հայաստանի ազգային կինոկենտրոնի աջակցությամբ: Բացման արարողությունը սկսվեց հայկական լավագույն ֆիլմերին անդրադարձող կոլաժով, այնուհետեւ ցուցադրվեցին Փելեշյանի ֆիլմերը:
Կինոակումբի ստեղծման նպատակն է ոչ միայն ԵՊՀ ուսանողներին ծանոթացնել հայ եւ համաշխարհային կինոարվեստի նշանավոր գործիչներին, լավագույն ֆիլմերին, այլեւ կազմակերպել ժամանակակից արժեքավոր ֆիլմերի դիտում-քննարկումներ կինոքննադատների եւ համապատասխան մասնագետների մասնակցությամբ: Կինոակումբը կկազմակերպի ֆիլմերի ցուցադրություններ ամիսը 2 անգամ:
