ՀՐԱԺԱՐՎՈՒՄ ԵՆ ԵՐԵԽԱՆԵՐԻՆ ԴՊՐՈՑ ՈՒՂԱՐԿԵԼ

Երեկ Շիրակի մարզպետարանի դիմաց Վարդաքար գյուղի բնակիչները պահանջում էին չփակել իրենց դպրոցը

«Եթե մի դելֆինարիա պակաս կառուցեն, մի քիչ գյուղի երեխաների մասին մտածեն ու դպրոց չփակեն՝ չի՞ լինի: Էսօր անգամ Թուրքիայում են հայկական դպրոցներ գործում, բայց հայրենի կառավարությունը կրթական բարեփոխումների շրջանակում մեր դպրոցն է վերացնում: Սա ոչ այլ ինչ է, քան գյուղաքանդիչ ծրագիր, չկա դպրոց՝ չկա գյուղ»,- երեկ Շիրակի մարզպետարան այսպիսի բողոք էին ներկայացնում վարդաքարցիները: Լսելով գյուղի դպրոցի փակման գույժը, նրանք ավտոբուսներ էին վարձել ու գյուղովի շտապել մարզպետարան՝ բացատրություն պահանջելու: Բանն այն է, որ դպրոցի շենքի վերանորոգումը 2010 թ.-ին մտցրել էին պետական բյուջե՝ այս նպատակի համար նախատեսելով մոտ 356 մլն դրամ, նույնիսկ նախահաշվային փաստաթղթեր են կազմվել, մրցույթ է հայտարարվել, մրցույթը շահած «Ջինշին» կազմակերպությունն էլ հասցրել է դպրոցի հին շենքը քանդել, որից հետո կառավարությունը «փոշմանել» ու հետ է կանչել շինկազմակերպությանը: Մինչեւ վերջերս գյուղացիները հույս էին փայփայում, որ կհստակեցվի իրենց դպրոցի շենքի խնդիրը, ու երեխաները չեն գնա հարեւան գյուղի՝ մոտ 3-4 կիլոմետր հեռավորության վրա գտնվող Նոր կյանքի դպրոց: Հիշեցնենք, որ այս ուսումնական տարվանից տարրական դասարանցիները դասերն անցկացնում էին գյուղի մանկապարտեզում, իսկ բարձրդասարանցիները՝ գյուղապետարանի շենքում:

Երեկ համայնքը կառավարությունից պաշտոնական նամակ է ստացել այն մասին, որ այս տարվա հոկտեմբերի 7-ի որոշմամբ չեղյալ է համարվում շենքի վերանորոգման ծրագիրը: Դպրոցի ուսուցիչների ներկայացմամբ, նամակում նաեւ խոսվում է այն մասին, որ 2012 թ.-ի բյուջեով եւս չի վերանորոգվելու շենքը: «Եթե հոկտեմբերի 7-ին որոշել էիք հանել պետական ծրագրից, ապա հոկտեմբերի 11-ին «Ջինշին» կազմակերպությունն ի՞նչ գործ ուներ գյուղում, ինչո՞ւ էր էդպիսի արագությամբ քանդում դպրոցի շենքը: Մենք դատի կտանք էդ կազմակերպությանը: Հո էս երկրում ամեն ինչ խաբելով չէ՞, Սերժ Սարգսյանին վստահեցինք, գյուղովի ձայն տվեցինք, որ էսպիսի ապտակ հասցնե՞ր մեզ… Ձայն ենք տվել, որ հարց լուծի: Մեր գյուղը 1820 թվականից՝ հիմնադրման օրից, դպրոց է ունեցել, սա ի՞նչ նորություն է»,- դժգոհում էին ուսուցիչները՝ տեղեկացնելով, որ իրենք վաղը բողոքի ակցիա են անցկացնելու նախագահի նստավայրի մոտ: Գյուղացիները մտահոգված են այն փաստով, որ դպրոցազուրկ լինելու դեպքում երիտասարդացող գյուղը միանգամից կդատարկվի: Նրանք մարզպետարանի դարպասների մոտ պատվիրակություն կազմեցին ու ուղարկեցին Շիրակի փոխմարզպետ Սեյրան Պետրոսյանի մոտ, սակայն մեկ ժամ անց, իրենց համար ձեռնտու պատասխան չլսելով, որոշեցին վաղը գյուղովի միտինգ անցկացնել նախագահականի մոտ: Բողոքի ակցիայից հետո մամուլի ասուլիս հրավիրեց Շիրակի փոխմարզպետը՝ պարզաբանելով. «Դպրոցի շինարարությունը դադարեցվել է, որովհետեւ Նոր կյանք գյուղում կառուցվում է հզոր, ժամանակակից տեխնիկական հագեցվածությամբ դպրոց՝ 360 աշակերտական տեղով, Նոր կյանքում եւ Վարդաքարում այսօր դպրոց հաճախող երեխաների թիվը եւս 100-ով պետք է ավելացվի, որ այդ դպրոցի հագեցվածության հարցը լուծվի: Ռեալ վիճակը սա է»: Փոխմարզպետը նշեց նաեւ, որ Վարդաքարի դպրոցականների համար ավտոբուսներ կտրամադրվեն հարեւան Նոր կյանքի դպրոց հաճախելու համար, եւ այդ ծախսերը կհոգա պետությունը: Նշենք, որ երեկվանից վարդաքարցիները իրենց երեխաներին դպրոց չեն ուղարկում եւ պատրաստվում են դիմել բողոքի տարբեր միջոցների: