Ավտոտրանսպորտային պատասխանատվության պարտադիր ապահովագրությունը, որ 2011-ի հունվարի 1-ից մտնում է ուժի մեջ, գյուղացիների համար մասամբ կգործի: Կառավարությունը գյուղական համայնքների բնակիչների համար արտոնություններ է սահմանել: ՀՀ վարչապետ Տիգրան Սարգսյանը երեկ կառավարության նիստում այս առթիվ հատուկ հանձնարարական տվեց ՀՀ ոստիկանությանը: Ըստ վարչապետի, պարտադիր ապահովագրության ինստիտուտը ենթադրում է, որ այն ավտոմեքենաները, որ ժամանակավորապես չեն օգտագործվում, կարող են չապահովագրվել կամ ապահովագրվել այն ժամկետի համար, որ օգտագործվել են. «Խոսքը գյուղական շրջաններում այն ավտոմեքենաների մասին է, որոնք տարվա ընթացքում գյուղացիներն օգտագործում են ընդամենը մի քանի ամիս: Դրանց քանակն, ի դեպ, բավականին շատ է: Պետք է հազարավոր գյուղացիների համար ստեղծենք բարենպաստ պայմաններ, որ նրանք կարողանան 2-3 ամսվա ընթացքում շահագործել իրենց ավտոտրանսպորտը եւ ապահովագրություն իրականացնեն միայն այդ ժամանակահատվածի համար»: Վարչապետը ոստիկանությանը հանձնարարեց հատուկ կարգեր հաստատել՝ հեշտացված ծառայություններ մատուցելու համար:
